Деңгейлес мониторингтің кейбір мәселелері туралы

Қазақстан Республикасы Салық кодексінің 49-бабы 4-тармағының төртінші бөлігіне, 146-бабы 2-тармағының төртінші және алтыншы бөлігіне, 147-бабы 1-тармағының төртінші бөлігіне, 2-тармағының екінші және төртінші бөлігіне, 148-бабының 6-тармағына сәйкес БҰЙЫРАМЫН:

1. Қоса беріліп отырған:

1) осы бұйрыққа 1-қосымшаға сәйкес деңгейлес мониторингке кіру үшін салық төлеушінің деректер сөресін ұйымдастыру жөніндегі ең төмен талаптар (одан әрі – Ең төмен талаптар);

2) осы бұйрыққа 2-қосымшаға сәйкес салықтық есептіліктің көрсеткіштерін ашып көрсетуге, сондай-ақ олардың салықтық, бухгалтерлік тіркелімдердің жəне салық салу объектілерін жəне (немесе) салық салуға байланысты объектілерді айқындау үшін негіз болып табылатын өзге де құжаттардың көрсеткіштерімен өзара байланысына қойылатын ең төменгі талаптар;

3) осы бұйрыққа 3-қосымшаға сәйкес салық салу саласындағы ішкі бақылау жүйесі жөніндегі ақпарат пен есептерге қойылатын талаптар;

4) осы бұйрыққа 4-қосымшаға сәйкес Деңгейлес мониторингке қатысу туралы өтініш беру және оны қарау қағидалары;

5) осы бұйрыққа 5-қосымшаға сәйкес Деңгейлес мониторинг туралы келісімді жасасу және бұзу қағидалары;

6) осы бұйрыққа 6-қосымшаға сәйкес Деңгейлес мониторинг жүргізу қағидалары;

7) осы бұйрыққа 7-қосымшаға сәйкес салық міндеттемесін орындау мәселелері бойынша деңгейлес мониторинг нәтижелері бойынша ұсыным нысаны;

8) осы бұйрыққа 8-қосымшаға сәйкес салық салу саласындағы ішкі бақылау жүйесін жақсарту жөніндегі деңгейлес мониторинг нәтижелері бойынша ұсыным нысаны;

9) осы бұйрыққа 9-қосымшаға сәйкес деңгейлес мониторингке қатысушының түсіндірмесімен келісу туралы хабарлама нысаны;

10) осы бұйрыққа 10-қосымшаға сәйкес қосымша талқылаулардың нәтижелері бойынша келіспеушілік хаттамасының нысаны;

11) осы бұйрыққа 11-қосымшаға сәйкес деңгейлес мониторинг жүргізуді қайта бастау туралы хабарлама нысаны;

12) осы бұйрыққа 12-қосымшаға сәйкес деңгейлес мониторинг бойынша уәжді шешім нысаны бекітілсін.

2. Осы бұйрыққа 13-қосымшаға сәйкес Қазақстан Республикасы Қаржы министрлігінің кейбір бұйрықтарының күші жойылды деп танылсын.

3. Қазақстан Республикасы Қаржы министрлігінің Мемлекеттік кірістер комитеті Қазақстан Республикасының заңнамасында белгіленген тәртіппен:

1) осы бұйрықтың Қазақстан Республикасының Әділет министрлігінде мемлекеттік тіркелуін;

2) осы бұйрық ресми жарияланғаннан кейін, оның Қазақстан Республикасы Қаржы министрлігінің интернет-ресурсында орналастырылуын;

3) осы бұйрық Қазақстан Республикасы Әділет министрлігінде мемлекеттік тіркелгеннен кейін он жұмыс күні ішінде осы тармақтың 1) және 2) тармақшасында көзделген іс-шаралардың орындалуы туралы мәліметтерді Қазақстан Республикасы Қаржы министрлігінің Заң қызметі департаментіне ұсынуды қамтамасыз етсін.

4. Осы бұйрық 2027 жылғы 1 қаңтардан бастап қолданысқа енгізілетін Ең төмен талаптардың 7-тармағының бірінші бөлігін және 14-тармағының 5) және 6) тармақшасын қоспағанда, 2026 жылғы 1 қаңтардан бастап қолданысқа енгізіледі және ресми жариялануға тиіс.

Қазақстан Республикасының Қаржы министрі

М. Такиев

Қазақстан Реcпубликасының

Қаржы министрі

2025 жылғы 22 қыркүйектегі

№ 520 бұйрығына

1-қосымша

Деңгейлес мониторингке кіру үшін салық төлеушінің деректер сөресін ұйымдастыру жөніндегі ең төменгі талаптар

1-тарау. Жалпы ережелер

1. Осы деңгейлес мониторингке қатысу үшін салық төлеушінің деректер сөресін ұйымдастырудың ең төменгі талаптары (бұдан әрі – Талаптар) Қазақстан Республикасың Салық кодексінің 146-бабы 2-тармағының төртінші бөлігіне сәйкес әзірленген және деңгейлес мониторингке қатысу үшін салық төлеушінің деректер сөресін ұйымдастыруға, соның ішінде оның функционалына қойылатын талаптарды айқындайды.

2. Осы Талаптарда қолданылатын негізгі ұғымдар:

1) салық есептілігі көрсеткіштерін ашу – қашықтықтан қолжетімділікті бере отырып, салықтар мен бюджетке төленетін төлемдер бойынша салық төлеушінің есептілік топтамасын деректер сөресінде орналастыру және жариялау;

2) есептілік топтамасы – деректер сөресінде жарияланған тиісті есепті салық кезеңі үшін салық немесе бюджетке төленетін төлемнің белгілі бір түрі бойынша құжаттамалар жиынтығы.

Есептілік топтамасы салық есептілігін және оның қосымшаларын, салық тіркелімдерін, оның ішінде жиынтық салық тіркелімдерді, талдамалық салық тіркелімдерін (бар болған жағдайда), бухгалтерлік есеп тіркелімдерін және (немесе) есепке алу жүйесінен автоматтандырылған түрде берілетін есептерді, құжаттардың электрондық карточкалары түріндегі бастапқы құжаттарды, сондай-ақ құжаттардың электрондық көшірмелерін, оның ішінде тиісті салық кезеңі үшін салық салу объектілерін және (немесе) салық салуға байланысты объектілерді айқындау үшін негіз болған бастапқы құжаттың сканерленген машинада оқылатын түпнұсқаларының көшірмесін қамтиды;

3) есепке алу жүйесі – қаржылық, салықтық және өзге де есептілікті құру мақсатында салық төлеушінің активтері, міндеттемелері, капиталы, шаруашылық және өзге де операциялары туралы деректерді жинауға, тіркеуге, өңдеуге арналған ақпараттық жүйе;

4) журналдау (логтау) – деңгейлес мониторингке қатысушылардың әрекеті мен деректер сөресінің техникалық жағдайы, сондай-ақ оларды сақтау туралы мәліметтерді жазу процесі;

5) жиындық (кумулятивтік) есептілік – тиісті салық кезеңі үшін бастапқы, кезекті және барлық қосымша ұсынылған салық есептілігінің негізінде қалыптастырылған шоғырландырылған деректерді қамтитын есептілік;

6) бақылау арақатынасы – салық есептілігі мен тіркелімдерді қалыптастырудың толықтығын бақылауға бағытталған, салық есептілігі көрсеткіштерінің дұрыс қалыптастырылуын тексеруге мүмкіндік беретін, деректер сөресінде орналастырылатын салық есептілігі мен есептер нысанының жолдары мен бөлімдерінің көрсеткіштері арасында автоматты салыстыруды көздейтін бақылау рәсімінің түрі;

7) ішкі нормативтік құжаттар – ұйымдағы бухгалтерлік және салықтық есепке алуды жүргізу регламентін айқындайтын бірыңғай қағидалар мен талаптар;

8) деректер сөресі – деңгейлес мониторинг шеңберінде уәкілетті орган мен салық төлеуші арасында кеңейтілген ақпараттық өзара іс-қимыл жүзеге асырылатын ақпараттық жүйе.

Осы Талаптарда қолданылатын өзге ұғымдар Қазақстан Республикасының заңнамасына сәйкес қолданылады.

3. Деректер сөресі ретінде көзделген ақпараттық жүйе:

1) салық төлеушінің есепке алу жүйесімен интеграцияланған салық төлеушінің жеке ақпараттық жүйесі;

2) салық төлеушінің қолданыстағы есепке алу жүйесіне үстеме және (немесе) қосымша функционал түрінде іске асырылуы мүмкін.

2-тарау. Деректер сөресін ұйымдастыру тәсілдері және оның функционалдары

4. Деректер сөресін ұйымдастыру мына функционалдарды іске асыру арқылы жүзеге асырылады:

ашудың 4 (төрт) деңгейі бойынша әрбір салық пен бюджетке төленетін төлем бойынша есептілік топтамасын жариялау және ашу және олардың өзара байланысы;

салық салу саласындағы ішкі бақылау жүйесі туралы ақпаратты ашу;

Қазақстан Республикасы Қаржы министрлігінің Мемлекеттік кірістер комитеті мен салық төлеуші арасында ақпаратпен және құжаттармен алмасу;

құжаттарды орналастыру;

нормативтік-анықтамалық ақпарат;

деректер сөресінің көмекші сервистері.

Бұл ретте осы талаптарға семантикалық және функционалдық сәйкестігі сақталған жағдайда деректер сөресі функционалдарының өзге де атауларын пайдалануға жол беріледі.

5. Деректер сөресі салық төлеуші туралы мына ақпаратты енгізу мүмкіндігін қамтамасыз етуі тиіс:

толық және қысқартылған атауы;

бизнес-сәйкестендіру нөмірі;

орналасқан жері;

мемлекеттік тіркеу (қайта тіркеу) туралы куәліктің нөмірі мен күні;

компанияның ресми сайты (бар болған жағдайда);

деректер сөресінің пайдалануға енгізілген күні;

деректер сөресінің URL-мекенжайы;

деректер сөресімен интеграцияланған есепке алу жүйелерінің тізімі.

1-параграф. Ашудың 4 (төрт) деңгейі бойынша әрбір салық пен бюджетке төленетін төлем бойынша есептілік топтамасын жариялау және ашу және олардың өзара байланысы

6. «Әрбір салық пен бюджетке төленетін төлем бойынша есептілік топтамасын 4 (төрт) ашу деңгейінде және олардың өзара байланысын жариялау және ашу» функционалы салықтық, бухгалтерлік және басқа да есепке алу түрінің деректерін қарау, салықтық есептілік көрсеткіштерін бастапқы құжаттар деңгейіне дейін ашу үшін арналған. Есептілік топтамасының көрсеткіштерін ашу мынадай құрылым (деңгейлер) бойынша іске асыру қажет:

бірінші ашу деңгейі (1-деңгей) – қосымшалары бар салықтық есептілік;

екінші ашу деңгейі (2-деңгей) – салықтық тіркелімдер, оның ішінде жиынтық салық тіркелімдері, талдамалық салық тіркелімдері (болған жағдайда);

үшінші ашу деңгейі (3-деңгей) – бухгалтерлік есепке алу тіркелімдері және (немесе) салық төлеушінің есепке алу жүйесінде қалыптастырылатын есептер;

төртінші ашу деңгейі (4-деңгей) – бастапқы құжаттар, оның ішінде құжаттардың электрондық карточкалары және электрондық көшірмелері, соның ішінде бастапқы құжаттардың сканерленген машинада оқылатын түпнұсқа көшірмелері.

Салық есептілігінің көрсеткіштерін және олардың деректер сөресіндегі өзара байланыстарын ашу декларация жолдарының деңгейінен транзакция деңгейіне және бастапқы құжаттарға дейінгі ақпаратты иерархиялық түрде ашуды көздейді (drill-down (жоғарыдан төменге)) және транзакциялар мен бастапқы құжаттар деңгейінен декларация жолының деңгейіне дейін иерархиялық ақпаратты ашу (drill-up (төменнен жоғары)).

Деректер сөресінде жиынтық (кумулятивтік) есептілік көрсеткіштерін ашу жиынтық (кумулятивтік) есептілік жолдарының деңгейінен транзакция деңгейіне және бастапқы құжаттарға (drill-down (жоғарыдан төменге) дейін ақпаратты иерархиялық ашуды көздеуге тиіс.

7. Деректер сөресі Қазақстан Республикасының салық заңнамасына сәйкес кезекті салық есептілігінің есептілік топтамасын жарияламай қосымша, оның ішінде салық есептілігінің хабарламасы бойынша қосымша салық есептілігінің топтамасын жариялауға жол бермеуі тиіс.

Деректер сөресі осы Талаптың 6-тармағына сәйкес көрсеткіштерді ашу арқылы кумулятивтік салықтық есептілікті қалыптастыруды қамтамасыз етуі тиіс.

8. Есептілік топтамасының көрсеткіштерін ашу кезінде деректер сөресі жинақталған (кумулятивтік) есептіліктің ішкі бақылау қатынастарын бақылауды, сондай-ақ жинақталған (кумулятивтік) есептілік деректерінің негізінде орындалатын әртүрлі салық есептілігі нысандары арасындағы бақылау қатынастарын қоса алғанда, бақылау қатынастарын орындауды қамтамасыз етуі тиіс.

9. Деректер сөресі есептілік топтамасының құрамына олардың орындалу нәтижелерін көрсете отырып орындалған бақылау қатынастарының хаттамасын қосуды қамтамасыз етуі тиіс. Бақылау қатынастарының карточкасында түсіндірмелер (түсіндірулер) енгізуге және растайтын құжаттарды тіркеуге арналған ашық жол болуға тиіс.

2-параграф. Салық салу саласындағы ішкі бақылау жүйесі туралы ақпаратты ашу

10. «Салық салу саласындағы ішкі бақылау жүйесі туралы ақпаратты ашу» функционалы:

1) тәуекел сипаттамасымен, Қазақстан Республикасының Салық кодексінің бабына және салық есептілігінің нысаны жолдарының кодына сілтемемен, сондай-ақ тәуекелдің туындау ықтималдығы мен оның салдарын бағалаумен тәуекел карточкасын жасауды;

2) салық төлеушінің бизнес-процесінде көзделген, тәуекелдерді анықтауға немесе алдын алуға бағытталған іс-қимылды сипаттаумен, салық есептілігінің нысаны жолдарының кодына сілтемемен, сондай-ақ бақылау рәсімдерін жүргізу жиілігі мен тәсілін, жауапты құрылымдық бөлімше мен салық төлеушінің жауапты тұлғасының лауазымын, сондай-ақ бақылау рәсімдерінн жүргізу тәртібін регламенттейтін салық төлеушінің ішкі нормативтік құжаттарын көрсетумен бақылау рәсімдерінің карточкасын жасауды;

3) тәуекелдердің, бақылау рәсімдерінің, сондай-ақ бақылау қатынастарының есептілік топтамасындағы салық есептілігі нысанының жолдарына байланысын көрсетуді;

4) жасалған тәуекелдер мен бақылау рәсімдері карточкаларының деректері, сондай-ақ «xls» және «xlsx» форматындағы жүктелген шаблондар негізінде мынадай есептерді:

салық төлеушінің тәуекелдер тізбесі;

салық төлеушінің бақылау рәсімдерінің тізбесі;

тәуекелдер мен бақылау рәсімдерінің матрицасы;

бақылау рәсімдерін орындау туралы есепті қалыптастыруды қамтамасыз етуі тиіс.

3-параграф 3. Комитет пен салық төлеуші арасында ақпаратпен және құжаттармен алмасу

11. «Қазақстан Республикасы Қаржы министрлігінің Мемлекеттік кірістер комитеті мен салық төлеуші арасында ақпарат және құжаттармен алмасу» функционалы:

1) Қазақстан Республикасының Қаржы министрлігі Мемлекеттік кірістер комитетінің лауазымды адамдары мен салық төлеушінің келісу мүмкіндігімен сұрау салулар мен жауаптарды қалыптастыру және жолдау;

2) сұрау салулар мен жауаптарға файлдар мен құжаттарды тіркеу;

3) сұрау салуға жауап дайындау мерзімін белгілеу және пайдаланушыларға жауап мерзімінің басталуы туралы хабарлауды;

4) сұрау салу жолданған және оған жауап алынған күні мен уақытын тіркеуді қамтамасыз етуі тиіс.

4-параграф. Құжаттарды орналастыру

12. «Құжаттарды орналастыру» функционалы құжаттарды машина оқитын форматтарда орналастыра отырып каталогтар (топтама) ағашы түрінде топтама құрылымын баптау мүмкіндігін қамтамасыз етуі тиіс.

5-параграф. Нормативтік-анықтамалық ақпарат

13. «Нормативтік-анықтамалық ақпарат» функционалы есептілік топтамасын ашуда қолданылатын әріптік-цифрлық кодтарды, қысқартуларды және (немесе) аббревиатураларды ашып жазуды қамтитын анықтамалықтар түріндегі нормативтік-анықтамалық ақпараттың, салық салу саласындағы ішкі бақылау жүйесі туралы ақпараттар мен есептердің болуын қамтамасыз етуі тиіс.

6-параграф. Деректер сөресінің көмекші сервистері

14. «Деректер сөресінің көмекші сервистері» функционалы:

1) деректерді сүзу және құжаттарды олардың атрибуттары бойынша іздеуді;

2) деректер сөресі арқылы оларды ашу жүзеге асырылған, деңгейлес мониторинг жүргізу басталған күннен бастап 5 (бес) жыл құжаттар мен оқиғалар журналдарын сақтауды қоса алғанда, үлкен көлемдегі деректерді өңдеуді және сақтауды;

3) жарияланған есептілік топтамасы бойынша журналдауды қарауға қолжетімділікпен есептіліктің жарияланған нұсқаларында өзгерістердің болмауын растайтын тіркеуді қамтамасыз етумен жарияланған есептілік топтамасына өзгерістер енгізуден қорғауды;

4) салық төлеушінің есепке алу жүйелерінен деректер сөресіне деректерді беру, оларды сақтау, түрлендіру және деректер сөресінде көрсету кезінде ақпараттың тұтастығын тексеруді;

5) Қазақстан Республикасының Қаржы министрлігі Мемлекеттік кірістер комитетінің ақпараттық жүйелерімен (салықтық әкімшілендірудің интеграцияланған жүйесі ақпараттық жүйесімен және электрондық шот-фактуралардың ақпараттық жүйесімен) Қазақстан Республикасындағы ақпараттық-коммуникациялық технологиялар саласындағы бірыңғай талаптарға сәйкестігіне сынақтардан сәтті өткен жағдайда деректер сөресін интеграциялау;

6) кейін «Салықтық әкімшілендірудің интеграцияланған жүйесі» ақпараттық жүйесіне жүктеу үшін XML форматына салық есептілігін айырбастау;

7) деректер сөресін салық салуға байланысты салық төлеушінің басқа жүйелерімен интеграциялау;

8) веб-браузер арқылы қауіпсіз қол жеткізуді (веб-интерфейс);

9) навигация және экрандық мәзірлер, батырмалар және (немесе) белгішелер жиынтығы арқылы деректер сөресінің функционалын басқару;

10) пайдаланушылардың парақ саны көп есептермен жұмыс істеуін қамтамасыз ететін экрандық нысандардың болуын;

11) Қазақстан Республикасының заңнамасына сәйкес деректер сөресін пайдаланушыға арналған оқшауланған интерфейстің болуын;

12) функционалды кеңейту және пысықтау мен дамыту мүмкіндігін қамтамасыз ететін деректер сөресі архитектурасының болуын қамтамасыз етуі тиіс.

3-тарау. Деректер сөресінің ақпараттық қауіпсіздігіне қойылатын талаптар

15. Деректер сөресінің ақпараттық қауіпсіздігі:

1) Қазақстан Республикасындағы ақпараттық-коммуникациялық технологиялар саласындағы бірыңғай талаптарға сәйкес келетін ақпараттық қауіпсіздік, құпиялық және деректер сөресіне қолжетімділікті;

2) қашықтықтан қол жеткізуді мына тәсілдердің бірімен ұсыну:

VPN арқылы (қорғалған арна бойынша);

VPN-сыз;

Қазақстан Республикасының ақпараттандыру саласындағы заңнамасына қайшы келмейтін өзге де тәсілдермен;

3) мыналар:

логин және пароль;

SMS хабарлама және (немесе) токен;

биометриялық сәйкестендіру арқылы (Digital ID немесе Aitu Passport сервистері) (салық төлеушінің таңдауы бойынша) сәйкестендірудің болуын;

4) салық төлеушінің есепке алу және басқа да жүйелерінен деректер сөресіне деректерді беру кезінде мына:

SOAP (Simple Object Access Protocol);

ODATA (Open Data Protocol);

Қазақстан Республикасының ақпараттандыру саласындағы заңнамасына қайшы келмейтін өзге де хаттамалардың бірін пайдалауды;

5) деректерді беру кезінде мына:

HTTPS (Hyper Text Transfer Protocol Secure);

TLS (Transport Layer Security);

өзге де, Қазақстан Республикасының ақпараттық-коммуникациялық технологиялар саласындағы бірыңғай талаптарға сәйкес келетін;

6) резервтік көшіруді және деректер сөресінің жұмысында олардың тиісінше жұмыс істеуіне қауіп төндіретін жеке немесе сериялық түрде туындайтын ақаулар кезінде электрондық ақпараттық ресурстардың уақтылы өзекткедірілуін бақылауды;

7) апат немесе ақаулық болған жағдайда деректер сөресін қалпына келтірудің нысаналы уақытын;

8) резервтік сақтаудан ақпараттарды қалпына келтірудің нысаналы нүктесін;

9) SSL сертификаттарының болуын;

10) журналдаудың (логтаудың) болуын;

Журналдар деректер сөресі пайдалануға енгізілген күннен бастап кемінде 5 (бес) жыл сақталуы қажет;

11) журналдауды өзгерту, жою және өшіру құқықтарын қоспағанда, қол жеткізу құқықтарын 3 (үш) типті жұмыс орнына бөлу мүмкіндігімен:

Қазақстан Республикасының Қаржы министрлігі Мемлекеттік кірістер комитетінің лауазымды адамы;

салық төлеушінің лауазымды тұлғасы;

деректер сөресінің әкімшісі рөлдік модельдің енгізілуін;

12) деректер сөресінің резервтік көшірмесімен оның негізгі техникалық компоненттерінің таратылған үздіксіз жұмыс істейтін архитектурасының болуы қамтамасыз етуі тиіс.

Қазақстан Реcпубликасының

Қаржы министрі

2025 жылғы 22 қыркүйектегі

№ 520 бұйрығына

2-қосымша

Салықтық есептіліктің көрсеткіштерін ашып көрсетуге, сондай-ақ олардың салықтық, бухгалтерлік тіркелімдердің жəне салық салу объектілерін жəне (немесе) салық салуға байланысты объектілерді айқындау үшін негіз болып табылатын өзге де құжаттардың көрсеткіштерімен өзара байланысына қойылатын ең төменгі талаптар

1-тарау. Жалпы ережелер

1. Осы салықтық есептіліктің көрсеткіштерін ашып көрсетуге, сондай-ақ олардың салықтық, бухгалтерлік тіркелімдердің жəне салық салу объектілерін жəне (немесе) салық салуға байланысты объектілерді айқындау үшін негіз болып табылатын өзге де құжаттардың көрсеткіштерімен өзара байланысына қойылатын ең төменгі талаптар (бұдан әрі – Талаптар) Қазақстан Республикасы Салық кодексінің 147-бабы 2-тармағының төртінші бөлігіне сәйкес әзірленді.

2. Осы Талаптарда пайдаланылатын негізгі ұғымдар:

1) салық есептілігі көрсеткіштерін ашу – Қазақстан Республикасы Қаржы министрлігінің Мемлекеттік кірістер комитетіне қашықтықтан қолжетімділікті бере отырып, салықтар мен бюджетке төленетін төлемдер бойынша салық төлеушінің есептілік топтамасын деректер сөресінде орналастыру және жариялау;

2) есептілік топтамасы – деректер сөресінде жарияланған тиісті есепті салық кезеңі үшін салық немесе бюджетке төленетін төлемнің белгілі бір түрі бойынша құжаттамалар жиынтығы.

Есептілік топтамасы салық есептілігін және оның қосымшаларын, салық тіркелімдерін, оның ішінде жиынтық салық тіркелімдерді, талдамалық салық тіркелімдерін (бар болған жағдайда), бухгалтерлік есеп тіркелімдерін және (немесе) есепке алу жүйесінен автоматтандырылған түрде берілетін есептерді, құжаттардың электрондық карточкалары түріндегі бастапқы құжаттарды, сондай-ақ құжаттардың электрондық көшірмелерін, оның ішінде тиісті салық кезеңі үшін салық салу объектілерін және (немесе) салық салуға байланысты объектілерді айқындау үшін негіз болған бастапқы құжаттың сканерленген машинада оқылатын түпнұсқаларының көшірмесін қамтиды;

3) есепке алу жүйесі – қаржылық, салықтық және өзге де есептілікті құру мақсатында салық төлеушінің активтері, міндеттемелері, капиталы, шаруашылық және өзге де операциялары туралы деректерді жинауға, тіркеуге, өңдеуге арналған ақпараттық жүйе;

4) drill-down (жоғарыдан төмен) – декларация жолдарының деңгейінен транзакция деңгейіне және бастапқы құжаттарға дейінгі ақпаратты иерархиялық ашу;

5) drill-up (төменнен жоғары) – транзакциялар мен бастапқы құжаттар деңгейінен декларация жолының деңгейіне дейінгі ақпаратты иерархиялық ашу.

2-тарау. 4 деңгей бойынша деректер сөресінде салық есептілігінің көрсеткіштерін ашуға қойылатын ең төменгі талаптар

3. Талаптар мынадай салық есептілігі бойынша (бұдан әрі – нысан) (drill – down) және кері (drill – up) 4 деңгей бойынша көзделген:

1) осы Талаптарға 1-қосымшаға сәйкес корпоративтік табыс салығы бойынша (100.00 – нысан) салық есептілігінің көрсеткіштерін ашуға қойылатын ең төменгі талаптар;

2) осы Талаптарға 2-қосымшаға сәйкес бейрезиденттің кірісінен төлем көзінен ұсталатын корпоративтік табыс салығы бойынша есептеу бойынша (101.04 – нысан) салық есептілігінің көрсеткіштерін ашуға қойылатын ең төменгі талаптар;

3) осы Талаптарға 3-қосымшаға сәйкес корпоративтік табыс салығы және үстеме пайдаға салынатын салық бойынша (150.00 – нысан) салық есептілігінің көрсеткіштерін ашуға қойылатын ең төменгі талаптар;

4) осы Талаптарға 4-қосымшаға сәйкес қосылған құн салығы бойынша (300.00 – нысан) салық есептілігінің көрсеткіштерін ашуға қойылатын ең төменгі талаптар;

5) осы Талаптарға 5-қосымшаға сәйкес кең таралған пайдалы қазбаларды қоспағанда, пайдалы қазбаларды өндіру салығы, экспортқа рента салығы, тарихи шығындарды өтеу жөніндегі төлем және қатты пайдалы қазбаларға арналған роялти бойынша (590.00 – нысан) салық есептілігінің көрсеткіштерін ашуға қойылатын ең төменгі талаптар.

4. Салық төлеуші ашудың мына деңгейлеріне сәйкес деректер сөресінде салық есептілігінің көрсеткіштерін ашуды жүзеге асырады:

1) ашудың бірінші деңгейі (1 – деңгей) – қосымшалары бар салық есептілігі;

2) ашудың екінші деңгейі (2 – деңгей) – салық тіркелімдері, оның ішінде жиынтық салық тіркелімдері, талдамалық салық тіркелімдері (бар болса);

3) ашудың үшінші деңгейі (3 – деңгей) – салық төлеушінің есепке алу жүйесінде қалыптастырылатын бухгалтерлік есеп тіркелімдері және (немесе) есептер;

4) тиісті салықтық кезең үшін салық салу объектілерін және (немесе) салық салуға байланысты объектілерді айқындау үшін негіз болған ашудың төрт деңгейі (4 деңгей) – құжаттардың электрондық карточкалары түріндегі бастапқы құжаттар, сондай-ақ құжаттардың электрондық көшірмелері, оның ішінде бастапқы құжаттар түпнұсқасының сканерленген машинада оқылатын көшірмелері.

Салықтың немесе бюджетке төленетін төлемнің белгілі бір түрі бойынша салық есептілігінің көрсеткіштерін ашудың 4 деңгейі көзделген жағдайларда, есептілік топтамасы осы тармақпен айқындалған ашудың 4 деңгейін қамтиды.

Салықтың немесе бюджетке төленетін төлемнің белгілі бір түрі бойынша ашудың 2 деңгейі бойынша салық есептілігінің көрсеткіштерін ашуға қойылатын талап көзделген жағдайларда, есептілік топтамасы осы тармақпен айқындалған ашудың бірінші және екінші деңгейін қамтиды. Осы тармақпен айқындалған ашудың үшінші және төртінші деңгейінің деректерін ашу Қазақстан Республикасының Қаржы министрлігі Мемлекеттік кірістер комитетінің сұрау салуы бойынша жүзеге асырылады.

5. Аталған деңгейлердің әрқайсысы бойынша ашуды іске асыру үшін осы Талаптарға 1, 2, 3, 4 және 5-қосымша пайдаланылады.

Осы Талаптардың 1, 2, 3, 4 және 5-қосымша ларының 7-бағанында «Міндетті» деген сөзбен «Әрбір салық және бюджетке төленетін төлем бойынша ашудың 4 (төрт) деңгейі бойынша есептілік топтамасын жариялау мен ашу және олардың өзара байланысы» деректер сөресінің функционалында міндетті түрде орналастыруға жататын бастапқы құжаттарды ашу тәсілі көрсетіледі.

Осы Талаптардың 1, 2, 3, 4 және 5-қосымша ларының 6, 7 және 8-бағанында «Рұқсат етілген» деген сөзбен бастапқы құжаттар салық төлеушінің таңдауы бойынша «Құжаттарды орналастыру», «Әрбір салық және бюджетке төленетін төлем бойынша ашудың 4 (төрт) деңгейі бойынша есептілік топтамасын жариялау мен ашу және олардың өзара байланысы» және «Қазақстан Республикасы Қаржы министрлігінің Мемлекеттік кірістер комитеті мен салық төлеуші арасында ақпарат және құжаттар алмасу» деректер сөресінің функционалдарында таңдау бойынша дербес орналастырылады.

6. Осы талаптарда белгіленген функционалдық сәйкестігі сақталған жағдайда, салық тіркелімі және бухгалтерлік есеп тіркелімі көрсеткіштерінің өзге де атауларын деректер сөресінде пайдалануға жол беріледі. Көрсетілген регистрлер көрсеткіштерінің реттілігін салық төлеуші дербес айқындайды.

Салық төлеуші салық есептілігін ашу үшін қажетті қосымша көрсеткіштерді іске асыра алады.

Салық төлеуші салық есептілігінің, салықтық және бухгалтерлік тіркелімдердің, сондай-ақ бастапқы құжаттардың көрсеткіштерін осы Талаптарға және жүзеге асырылатын қызметтің ерекшеліктерін ескере отырып ашады. Егер салық есептілігінің, салықтық және бухгалтерлік тіркелімдердің, сондай-ақ бастапқы құжаттардың жекелеген көрсеткіштері нақты шаруашылық операцияларына және (немесе) салық төлеушінің қызметіне қолданылмаса, олардың қолданылмау себептері мен тиісті негіздемелері Деңгейлес мониторингке қатысу туралы өтінішті беру және қарау қағидаларының 5, 6 және 7-қосымшасы нда көзделген салықтық, бухгалтерлік тіркелімдер мен бастапқы құжаттардың көрсеткіштерін ашудың сипаттамасы бойынша нысандарда көрсетіледі.

3-тарау. 2 деңгей бойынша деректер сөресінде салық есептілігінің көрсеткіштерін ашуға қойылатын ең төменгі талаптар

7. 2-ші деңгей бойынша салық есептілігінің көрсеткіштерін ашуға қойылатын ең төменгі талаптар:

1) осы Талаптарға 6-қосымшаға сәйкес декларация тапсырылғаннан кейін төленуге жататын корпоративтік табыс салығы бойынша аванстық төлемдер сомасын есептеу бойынша (101.02 – нысан) салық есептілігінің көрсеткіштерін ашуға қойылатын ең төменгі талаптар;

2) осы Талаптарға 7-қосымшаға сәйкес резиденттің кірісінен төлем көзінен ұсталған корпоративтік табыс салығы бойынша есептеу бойынша (101.03 – нысан) салық есептілігінің көрсеткіштерін ашуға қойылатын ең төменгі талаптар;

3) осы Талаптарға 8-қосымшаға сәйкес жеке табыс салығы және әлеуметтік салық бойынша (200.00 – нысан) салық есептілігінің көрсеткіштерін ашуға қойылатын ең төменгі талаптар;

4) осы Талаптарға 9-қосымшаға сәйкес тауарларды әкелу және жанама салықтарды төлеу туралы өтініш бойынша (328.00 – нысан) салық есептілігінің көрсеткіштерін ашуға қойылатын ең төменгі талаптар;

5) осы Талаптарға 10-қосымшаға сәйкес акциз бойынша (400.00 – нысан) салық есептілігінің көрсеткіштерін ашуға қойылатын ең төменгі талаптар;

6) осы Талаптарға 11-қосымшаға сәйкес қол қою бонусы және коммерциялық анықтау бонусы бойынша (510.00 – нысан) салық есептілігінің көрсеткіштерін ашуға қойылатын ең төменгі талаптар;

7) осы Талаптарға 12-қосымшаға сәйкес жер қойнауын пайдалануға балама салық бойынша (600.00 – нысан) салық есептілігінің көрсеткіштерін ашуға қойылатын ең төменгі талаптар;

8) осы Талаптарға 13-қосымшаға сәйкес көлік құралдарына салынатын салық, жер салығы және мүлік салығы бойынша (700.00 – нысан) салық есептілігінің көрсеткіштерін ашуға қойылатын ең төменгі талаптар;

9) осы Талаптарға 14-қосымшаға сәйкес мүлік салығы бойынша ағымдағы төлемдер (701.01 – нысан) салық есептілігінің көрсеткіштерін ашуға қойылатын ең төменгі талаптар;

10) осы Талаптарға 15-қосымшаға сәйкес жер учаскелерін пайдаланғаны үшін төлемақының ағымдағы төлемдердің сомалар есебі бойынша (851.00 – нысан) салық есептілігінің көрсеткіштерін ашуға қойылатын ең төменгі талаптар;

11) осы Талаптарға 16-қосымшаға сәйкес жер үсті көздерінің су ресурстарын пайдаланғаны үшін төлемақы бойынша (860.00 – нысан) салық есептілігінің көрсеткіштерін ашуға қойылатын ең төменгі талаптар;

12) осы Талаптарға 17-қосымшаға сәйкес қоршаған ортаға эмиссия үшін төлемақы бойынша (870.00 – нысан) салық есептілігінің көрсеткіштерін ашуға қойылатын ең төменгі талаптар.

8. Салық төлеуші осы Талаптарға 6, 7, 8, 9, 10, 11, 12, 13, 14, 15, 16 және 17-қосымшаға сәйкес 2 деңгей бойынша деректер сөресінде салық есептілігінің көрсеткіштерін ашуды жүзеге асырады.

9. Осы талаптарда белгіленген функционалдық сәйкестігі сақталған жағдайда, деректер сөресінде салық тіркелімі көрсеткіштерінің өзге де атауларын пайдалануға жол беріледі. Салық тіркелімі көрсеткіштерінің реттілігін салық төлеуші дербес айқындайды.

Салық төлеуші салық есептілігін ашу үшін қажетті қосымша көрсеткіштерді іске асыра алады.

10. Салық төлеуші осы тарауда көзделген нысандар бойынша салықтық есептілік көрсеткіштерін 4 деңгейде дербес ашуға құқылы. Бұл ретте бухгалтерлік есептің тіркелімдерін және (немесе) есептік жүйеде қалыптастырылатын есептерді, сондай-ақ бастапқы құжаттарды деректер сөресінің функционалдарында орналастыру тәсілдерін салық төлеуші Қазақстан Республикасы Қаржы министрлігінің Мемлекеттік кірістер комитетімен келісу бойынша дербес айқындайды.

Салық есептілігі көрсеткіштерін ашуға, сондай-ақ олардың салықтық, бухгалтерлік тіркелімдерінің және салық салу объектілерін және (немесе) салық салуға байланысты объектілерді айқындау үшін негіз болып табылатын өзге де құжаттардың көрсеткіштерімен өзара байланыстарына қойылатын ең төменгі талаптарға

1-қосымша

Нысан

Корпоративтік табыс салығы бойынша салық есептілігінің (100.00-нысан) көрсеткіштерін ашуға қойылатын ең төменгі талаптар