Тәлімгерлік жөніндегі ұйымдарға жетім балалар, ата-анасының қамқорлығынсыз қалған балалар туралы берілетін ақпарат көлемін айқындау туралы

«Қазақстан Республикасындағы баланың құқықтары туралы» Қазақстан Республикасы Заңының 28-2-бабы 9-тармағының 1) тармақшасына сәйкес БҰЙЫРАМЫН:

1. Тәлімгерлік жөніндегі ұйымдарға берілетін жынысы, жасы, ұлты, денсаулық жағдайы, мінез ерекшеліктері, қызығушылықтары мен құмарлықтары, оқуы, ата-анасының қамқорлығының болмау себептері, аға-інілері мен апа-сіңлілерінің, кәмелетке толған туыстарының болуы туралы мәліметтер бар жетім балалар, ата-анасының қамқорлығынсыз қалған балалар туралы ақпарат көлемі айқындалсын.

2. Қазақстан Республикасы Оқу-ағарту министрлігінің Балалардың құқықтарын қорғау комитеті Қазақстан Республикасының заңнамасында белгіленген тәртіппен:

1) осы бұйрықтың Қазақстан Республикасы Әділет министрлігінде мемлекеттік тіркелуін;

2) осы бұйрық ресми жарияланғаннан кейін оны Қазақстан Республикасы Оқу-ағарту министрлігінің интернет-ресурсында орналастырылуын;

3) осы бұйрық Қазақстан Республикасы Әділет министрлігінде мемлекеттік тіркеуден өткеннен кейін он жұмыс күні ішінде Қазақстан Республикасы Оқу-ағарту министрлігінің Заң департаментіне осы тармақтың 1) және 2) тармақшаларында көзделген іс-шаралардың орындалуы туралы мәліметтерді ұсынуды қамтамасыз етсін.

3. Осы бұйрықтың орындалуын бақылау жетекшілік ететін Қазақстан Республикасының Оқу-ағарту вице-министріне жүктелсін.

4. Осы бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.

Қазақстан Республикасы Оқу-ағарту министрі

Г. Бейсембаев