Жерді жалға алуды қалай ұзартуға болады?

Мемлекеттік көрсетілетін қызметті облыстардың, республикалық маңызы бар қалалардың, астананың, аудандардың, облыстық маңызы бар қалалардың жергілікті атқарушы органдары, аудандық маңызы бар қалалардың, кенттердің, ауылдардың, ауылдық округтердің әкімдері (бұдан әрі – көрсетілетін қызметті беруші) жеке және заңды тұлғаларға (бұдан әрі – көрсетілетін қызметті алушы) көрсетеді.

Жер учаскесін жалдау мерзімін ұзартуға өтінішті осы Қағидаларға 2-қосымшаға сәйкес нысан бойынша және Тізбенің 8-тармағында көрсетілген құжаттарды қабылдау көрсетілетін қызметті берушінің кеңсесі арқылы не www.egov.kz порталы арқылы жүзеге асырылады.

Мемлекеттік қызмет көрсету үшін көрсетілетін қызметті алушыдан талап етілетін құжаттар мен мәліметтердің тізбесі:

Қазақстан Республикасы Ауыл шаруашылығы министрінің 2020 жылғы 1 қазандағы № 301 бұйрығымен бекітілген «Жер учаскесін жалдау мерзімін ұзарту» мемлекеттік қызметін көрсету қағидаларына (Нормативтік құқықтық актілерді мемлекеттік тіркеу тізілімінде № 21366 болып тіркелген) (бұдан әрі – Қағидалар) 2-қосымшаға сәйкес нысан бойынша жер учаскесін жалдау мерзімін ұзартуға өтініш;

сәйкестендіру құжатының көшірмесі (жер учаскесіне уақытша өтеулі (ұзақ мерзімді, қысқа мерзімді) жер пайдалану (жалдау) құқығына арналған акт немесе жер-кадастрлық жоспар);

жер учаскесін уақытша (қысқа мерзімді, ұзақ мерзімді) өтеулі жер пайдалану (жалдау) туралы жасалған шарттың көшірмесі (шарт туралы ақпарат жылжымайтын мүліктің бірыңғай мемлекеттік кадастрының ақпараттық жүйесінде болмаған жағдайда ұсынылады).

Елді мекен шегінде орналасқан жер учаскесінің жалдау мерзімін ұзарту үшін өтініш аудандық маңызы бар қаланың, кенттің, ауылдың, ауылдық округтің жергілікті атқарушы органына беріледі.

Елді мекеннен тыс орналасқан жер учаскесінің (ауыл шаруашылығы мақсатындағы жерлер, егістік, жайылым және т.б.) жалдау мерзімін ұзарту үшін өтініш ауданның жергілікті атқарушы органына беріледі.