Қазақ халқының ұлттық құндылықтарын насихаттау, киіз үйдің тарихы мен оның тәрбиелік мәнін жас ұрпаққа таныстыру мақсатында Екібастұз тарихи – өлкетану музейінде «Киіз үй кеңістігі: тәрбие мен тәлімнің бастауы» атты этнографиялық ART кеші ұйымдастырылады.
Кеш барысында қазақ қоғамында киіз үйдің алатын орны, оның ішкі құрылысының орналасу реті, әр бөлігінің мән-мағынасы және бала тәрбиесіне, адам болмысының қалыптасуына тигізетін әсері туралы кеңінен әңгіме қозғалады. Сонымен қатар, салт-дәстүрлер мен отбасы тәрбиесіндегі киіз үй кеңістігінің рөлі талқыланады.
Этнографиялық ART кешіне «Асыл әже» қоғамдық бірлестігінің мүшелері арнайы қатысып, өз тәжірибелерімен бөліседі. Қоянды ауыл клубының жетекшісі Қазына Алпысбаева құрметті қонақ ретінде кештің мазмұнын толықтырып, ұлттық мұра туралы тағылымды ой-пікірлерін ортаға салады. Көрермен қатарын №11, 12 ЖОББМ оқушылары толықтырады.
Шара барысында ұлттық бұйымдар көрмесі ұйымдастырылып, оқушылар танымдық сұрақ-жауап алаңына қатысады. Кеш жас ұрпақтың ұлттық мәдениетке деген қызығушылығын арттырып, рухани құндылықтарды қадірлеуге тәрбиелейді.