Автокөліктегі өрттердің алдын алу
Жыл басынан бері Қарағанды облысында автокөліктерде 67 өрт оқиғасы тіркелді. Автокөліктегі өрттердің негізгі себептерінің бірі – электр жабдықтарын монтаждау және техникалық пайдалану талаптарының бұзылуы.
Автокөліктердегі өрттер мен жану жағдайларының алдын алу мақсатында Қарағанды облысының Төтенше жағдайлар департаменті азаматтарға өрт қауіпсіздігі қағидаларын қатаң сақтауды ескертеді.
Автокөлікті пайдалану кезіндегі өрт қауіпсіздігі қағидалары:
электр сымдарының жарамды күйде болуын қамтамасыз етіп, автокөлікті техникалық тексеруден уақтылы өткізу;
қолданыста болған автокөлікті сатып аларда оның электр сымдарының жағдайын мұқият тексеру;
ұнтақты немесе көмірқышқылды өрт сөндіргішті автокөлікте қолжетімді жерде сақтау;
өрт сөндіргішті тек мамандандырылған дүкендерден сатып алып, оның жарамдылық мерзімі мен техникалық жағдайын жүйелі түрде тексеріп отыру.
Автокөлік құралдарында аккумуляторларды тікелей қуаттауға, қозғалтқыштарды ашық отпен (от жағу, алау, дәнекерлеу шамы және т.б.) жылытуға, сондай-ақ жарықтандыру үшін ашық от көздерін пайдалануға жол берілмейді.
Қарағанды облысы ТЖД баспасөз қызметі