Жаңатұрмыс ауылдық округі, Байсын ауылының 2026жылдың
6 айында атқарған жұмыстары туралы
АНЫҚТАМА
Жаңатұрмыс ауылдық округі, Байсын ауылында 2026 жылдың
1 шілдесіне тұрғын үй саны 207, халық саны 1132 адам. Ауылда қоғамдық-саяси ахуал тұрақты. Ауыз су, аяқ су, электр жарығы, көгілдір отын және басқада мәселелер өз шешімін тапқан.
ӘЛЕУМЕТТІК САЛА:
2026 жылдың 6 айы бойынша мемлекет тарапынан атаулы әлеуметтік көмек алған отбасы -жоқ.
Жаңа жұмыс орнына 17 адам тұрақты жұмыспен орналастырылса, ақылы қоғамдық жұмыспен 12 адам тартылды.
Ауылдың тұрмысы төмен отбасылары үнемі бақылауға алынып, қолдау шаралары көрсетіліп келеді. Ауылға қарасты мекеме басшылары, ауылдық округ әкімшілігі және кәсіпкерлермен бірлесе отырып даталы мерекелерде, қайырымдылық акциясы аясында ауылдың тұрмысы төмен отбасылары азық-түлікпен қамтамасыз етіліп, мерекелік шараларда кәсіпкерлердің демеушілігімен сый сияпаттар беріліп отырады.
«Таза Қазақстан» Республикалық экологиялық акциясы аясында үнемі сенбілік жұмыстары ұйымдастырылып, жасыл аймақ бойынша ауылдағы мекемелер мен саябаққа 700 түп ағаш отырғызылды.
Байсын ауылына келетін «Әлімұса» каналы (2 шақырым) жері қайыр басқан топырақтан тазартылды. Қазіргі таңда ауыл тұрғындары аяқ суды кедергісіз пайдалануда.
Ағымдағы жылдың көктемгі әскерге шақыру науқанына ауылдық округтен 1 бала шақыртылып, 1 бала әскер қатарына аттанды.
ШАҒЫН ЖӘНЕ ОРТА КӘСІПКЕРЛІКТІ ДАМЫТУ БАРЫСЫ ТУРАЛЫ:
Есепті кезеңде ауылдық округ бойынша тіркелген субъектілер саны 98-ге жетсе, оның: 10-ы заңды тұлғалар, 24 шаруа қожалықтар, 64 -і түрлі саладағы жеке кәсіпкерлер.
Ауылдық округте шағын және орта бизнесті, кәсіпкерлікті дамытудың іс-шара жоспарын бекітіп, жоспарға сәйкес, ауыл тұрғындарынан «Бизнес Бастау», «Аманат» жобалары бойынша ауыл тұрғындарына түсіндірме ақпараттық жұмыстары ұдайы жүргізіліп, нәтижесінде 6 айдың қорытындысымен «Ауыл Аманаты» жобасымен 3 ауыл тұрғыны 19 млн 600 мың тг (1 адам 6 100,0 тг жылыжай, 1 адам 6 100,0 бал ара, 1 ауыл тұрғыны асыл тұқымды мал шаруашылығы) алған.
Сонымен қатар, балық шаруашылығы бойынша 34 млн 600 мың тг көлемінде Кооператив жобасының ашылу жұмыстары жүргізілуде.
Барлығы ауылдық округ бойынша 3 адам 19 млн 600 мың теңге несие алып жұмыс жасауда.
ЖЕРГІЛІКТІ САЛЫҚ ТҮСІМДЕРІ ТУРАЛЫ:
Байсын ауылы бойынша 2026 жылдың 6 айының қорытындысымен көлік салығына 2 млн 998 мың теңге, мүлік салығына 48 мың теңге,табыс салығы 300,0 млн теңгеге орындалып, барлығы 6 млн 046 мың теңгесалық жиналды .
АУЫЛШАРУАШЫЛЫҒЫ САЛАСЫ:
Ауылдық округ бойынша 24 шаруа қожалығы тіркелген. Олардың 3 егін және мал шаруашылығымен, қалған 21 бірыңғай мал шаруашылығымен айналысады.
Сондай-ақ, ауыл тұрғындарының азық-түлік бағасын тұрақтандыру мақсатында шаруа қожалық жерінен ауылдың азаматтары әлеуметтік маңызы бар картоп, көкініс, бақша өнімдерін егіп, өнім алынуда.
Сонымен қатар, мал шаруашылығы бойынша 2026 жылдың 6 айының қорытындысы бойынша МІҚ 3444 бас, уақ мал – 1621, жылқы 635 бас және 200 бас құс тіркелген.
ИНФРАҚҰРЫЛЫМЫН ДАМЫТУ ЖҰМЫСТАРЫ ТУРАЛЫ:
Байсын ауылында 16 көше орналасқан. Жалпы жолдардың ұзындығы 10,8 км, олардың ішінде 6,2 км болатын 8 көшеге асьфалт жұмыстары жүргізілген. Ал 4,6 км болатын 6 көшеге қиыршық тас (гравийно-щебеночное) төселген.
Аудандық бюджеттен 11 млн. 200 мың теңге бөлініп, ауылдың Ақмешіт, Сейхун, А.Байкенжеев, Ә.Оспанқұлов, С.Тобағабылов, С.Асанов көшелерінің тұйығына және Е.Жұмабаев көшелеріне қиыршық тас (гравийно-щебеночное) төселді.
Ал биыл ағымдағы жыл Байсын ауылында орналасқан Сейхун, Ә.Оспанқұлов, А.Байкенжеев, С.Тобағабылов және 1 квартал көшелерінің автомобиль жолдарын күрделі жөндеу жұмыстарын жүргізуге жоба сметалық құжаттары әзірленді және сараптаманың оң қорытындысы алынды.
Абаттандыру бойынша Байсын ауылының кіре берісіне арка және төлқұжат орнату жұмыстары жүргізілді. Қазіргі таңда жұмыстар толығымен аяқталды. Жоба құны 13308,8 млн теңгені құрайды.
Аудандық бюджеттен жоба құны 14 895 млн теңгеге Т.Нәлібаев, А.Қазыбаев, Ә.Палмағанбетов, С.Асанов және С.Тобағабылов, А.Байкенжеев көшелеріне көше жарық шамдарын орнату жұмыстары жүргізілді.
Байсын ауылы аумағында орналасқан тұрмыстық қатты қалдықтарды тастайтын полигонды қоршалау жұмыстары жүргізілді. Күл қоқыс тастау орны (полигон), арнайы техника көмегімен тазаланып, қордаланған мусорлар алынды, жоба құны 4 млн 368 мың теңгені құрады.
БІЛІМ САЛАСЫ:
№207 Жаңатұрмыс орта мектебінде 35 мұғалім және 35 техникалық қызметкерлер жұмыс атқарады. 2025-26 оқу жылында 249 оқушы білім алуда.
ДЕНСАУЛЫҚ САҚТАУ САЛАСЫ:
Ауылдың фельдшерлік-акушерлік бекетінде 4 қызметкер жұмыс жасайды.
1- фельдшер, 1 акушер, 2 техникалық қызметші.
Дәрігерлік қабылдауға ағымдағы жылдың 6 айында 2207 адам тіркелсе, ҚР ДСМ-нің 2016 жылғы №361 бұйрығына сәйкес скринингтік тексеруден 209 ауыл тұрғындары өтті. Диспансерлік бақылауда тұратындар саны-230 адам. Осы бақылауда тұрған науқастар тиесілі дәрі-дәрмектерін тегін алып отыр. 2026 жылдың 6 айында 7 нәресте дүниеге келсе, қайтыс болған адамдар саны жоқ .
МӘДЕНИЕТ САЛАСЫ:
«Байсын» ауылдық мәдениет үйі ауыл тұрғындарына өз дәрежесінде қызметтерін көрсетіп келеді. Мәдениет үйінде 5 үйірме және «Байсын әжелері» ансамблі мен «Заңғарым» әкелер ансамблі жұмыс жасайды. Барлық үйірме қатысушылары республикалық, облыстық, аудандық ұйымдастырылған шараларға қатысып, жүлделі орынмен оралуда.
Даталы мерекелік күндерге орай, 6 айда аудандық, ауылдық деңгейде түрлі 65 шара өткізілді.
Ақылы қызмет 2026 жылдың 6 айында 480 мыңға орындалған.