Қазақстан Республикасы Үкіметінің 2022 жылғы 31 желтоқсандағы № 1147 қаулысымен бекітілген «Әртүрлі нысаналы топтар деңгейінде декомпозицияланған ақпараттық жұмыс жүргізу жөніндегі іс-шаралар жоспарының» 1 және 2-тармақтарына сәйкес халық арасында сыбайлас жемқорлық көріністеріне тап болған жағдайда іс-қимыл тәртібін және сыбайлас жемқорлық үшін жауаптылықты түсіндіретін үлестірме материалдарды әзірлеу және тарату, сондай-ақ баннерлік өнімдерді дайындау және орналастыру көзделген.
Өз кезегінде, Қазақстан Республикасы Үкіметінің 2026 жылғы 8 қазандағы № 884 қаулысымен енгізілген өзгерістерге сәйкес аталған іс-шаралар бойынша Қазақстан Республикасының Мемлекеттік қызмет істері агенттігі мен жергілікті атқарушы органдар жауапты орындаушылар болып айқындалған.
Осы іс-шараларды іске асыру шеңберінде Агенттікпен сыбайлас жемқорлыққа қарсы мәдениетті қалыптастыруға бағытталған визуалды айдентика нұсқаулығы мен ақпараттық баннерлердің бірыңғай топтамасы әзірленді.
Атап айтқанда, білім беру, денсаулық сақтау, ауыл шаруашылығы, еңбек және әлеуметтік қорғау, мәдениет, мемлекеттік көрсетілетін қызметтер, мемлекеттік сатып алу, мемлекеттік қызмет және квазимемлекеттік сектор салалары қамтылған.
Аталған материалдар баннерлерді әзірлеуге арналған үлгілік эскиздер болып табылады.
Осыған байланысты, жергілікті атқарушы органдарға:
1) ұсынылған визуалды айдентика нұсқаулығы мен ақпараттық баннерлердің бірыңғай топтамасын негізге ала отырып, тиісті баннерлерді әзірлеуді;
2) қоса беріліп отырған сілтеме арқылы баннерлерді тиісті нысаналы аудиториялар мен тақырыптық бағыттарды ескере отырып, халық көп шоғырланатын және азаматтарға қолжетімді орындарда орналастыруды;
3) баннерлерді орналастыру орындарын олардың мазмұнына сәйкес айқындауды, оның ішінде тиісті салалардағы мемлекеттік органдардың, ұйымдардың, әлеуметтік және сервистік объектілердің ғимараттарында, сыртқы жарнама және өзге де ақпараттық алаңдарда пайдалануды;
4) ақпараттық материалдардың мазмұны мен визуалдық тұтастығын сақтай отырып, оларды тиісті ақпараттық тасымалдағыштардың техникалық форматтарына бейімдеуді сұраймыз.
Сонымен қатар, Агенттіктің аумақтық департаменттері:
1) жергілікті атқарушы органдармен өзара іс-қимыл жасай отырып, баннерлерді тиісті орындарда орналастыру және тарату жөніндегі жұмысты үйлестіруі;
2) жұмыстың нақты орындалуын, оның ішінде орналастыру орындары мен тарату көлемін бақылауды қамтамасыз етуі тиіс.