Қазақстанда кәсіпкерлерді қолдау және сүйемелдеу орталықтары пилоттық режимде жұмыс істей бастады. Кәсіпкерлер бұл орталықтарға қаржыландыру, қарыздар, салықтар, мемлекеттік қолдау және өнімді өткізу мәселелері бойынша жүгіне алады.
«Даму» қорының мамандары бизнеске жай ғана кеңес беріп қоймай, мәселені шешуге қай мемлекеттік органның немесе ұйымның көмектесе алатынын анықтайды. Сондай-ақ тиісті мекемелерді мәселені шешу процесіне тартып, кәсіпкердің өтініші нақты нәтиже алғанға дейін сүйемелдейді. Бұл туралы Digtial Business жазды.
Кәсіпкерлерге қалай көмек көрсетіледі
Қазір бірнеше мемлекеттік органның қатысуын қажет ететін мәселе туындаған жағдайда, кәсіпкер көбіне әр ұйымға жеке-жеке жүгінуге мәжбүр. Жаңа механизм осы тәсілді өзгертуге бағытталған.
Кәсіпкер «Даму» қорының өңірлік филиалына жүгінеді. Мұнда мамандар алдымен мәселені жан-жақты саралап, диагностика жүргізеді. Одан кейін оны шешудің ықтимал жолы анықталып, сүйемелдеу маршруты әзірленеді.
Жағдайға қарай жұмысқа мемлекеттік органдар, қаржы институттары, жергілікті атқарушы органдар және «Бәйтерек» холдингінің тобына кіретін ұйымдар тартылуы мүмкін.
Бұл ретте қор барлық қатысушылардың өзара іс-қимылын үйлестіріп, кәсіпкерге мәселе бойынша нақты шешім қабылданғанға дейін қолдау көрсетеді.
Яғни мәселені шешу үшін бірнеше ұйымның қатысуы қажет болған жағдайда, кәсіпкерге әр мемлекеттік органға өз бетімен барып жүрудің қажеті болмайды.
Қандай мәселелер бойынша жүгінуге болады
Пилоттық жоба аясында бизнестің қаржылық тұрақтылығына және қызметін жалғастыруына тікелей әсер ететін мәселелерге басымдық берілді.
Кәсіпкерлерге мына бағыттар бойынша көмек көрсетіледі:
- берешекті қайта құрылымдау және қаржыландыруға қолжетімділікті іздеу;
- мемлекеттік қолдау шараларын алу;
- салық берешегін реттеу;
- өткізу нарықтарына қолжетімділікті қалпына келтіру және өнімді ілгерілету;
- кәсіпкерлік құзыреттерді дамыту;
- агроөнеркәсіптік кешендегі (АӨК) бизнесті мемлекеттік қолдау және қаржыландыру мәселелері.
Яғни әңгіме тек несие мәселелері бойынша кеңес берумен шектелмейді. Егер кәсіпкер бір мезетте қарыз, салық, өнімді өткізу немесе қаржыландыруға қолжетімділік мәселелеріне тап болса, оның мәселесі кешенді түрде қаралады.
«Даму» консультациялар санын емес, нәтижені бағалайды
Жаңа формат үшін кәсіпкердің жүгінген фактісінің өзі емес, оның қандай нәтижемен аяқталғаны маңызды. Сондықтан Орталықтардың тиімділігін бағалаудағы негізгі көрсеткіштердің бірі – реттелген өтініштердің үлесі.
Сонымен қатар бизнестің қаржыландыруға және өткізу нарықтарына қолжетімділігін қалпына келтіру мүмкіндігі, проблемалық несиелер мен салық мәселелерін шешу, сондай-ақ өтініштерді қарау мерзімдерінің сақталуы бақылауда болады.
Орталықтардың тағы бір міндеті – жиі қайталанатын мәселелер бойынша талдау жүргізу. Егер әртүрлі өңірлердегі кәсіпкерлер үнемі бір кедергіге тап болса, бұл бизнеске қойылатын жүйелік тосқауылдарды анықтауға мүмкіндік береді. Осы негізде қолданыстағы мемлекеттік қолдау шаралары мен заңнамаға өзгерістер енгізу жөнінде ұсыныстар әзірленеді.
Әзірге орталықтар бес өңірде ғана жұмыс істейді
Пилоттық жоба 2026 жылдың соңына дейін жалғасады. Одан кейін «Даму» қоры жаңа механизмнің тиімділігін бағалап, оны Қазақстанның басқа өңірлеріне тарату мүмкіндігі бойынша ұсыныстар әзірлейді.
Қазір Кәсіпкерлерді қолдау және сүйемелдеу орталығына қордың Астана, Алматы, Шымкент қалаларындағы, Солтүстік Қазақстан және Ақтөбе облыстарындағы өңірлік филиалдары арқылы жүгінуге болады.
Филиалдардың мекенжайлары мен байланыс деректері «Даму» қорының ресми сайтында қолжетімді. Сонымен қатар ақпаратты 1408 бірыңғай байланыс орталығы арқылы алуға болады.
